Munti algem sem konsiensia sobri um movimentu sosial podi fla Korrenti dja kaba. Na verdadi nau, kela podi ser mas um propaganda falsu pa menti fraku ki ka sabi kuze ki e um movimentu sosial ki fari NEOKOLONISLISMU MENTAL ALERTA INISIAL MAS DIRETU DI KORENTI.
Razom e pamodi pisoas oki es ka sta ativu ou na movimenta djuntu ku bo es ta skodji pa muvi na otu barku ki ta parses ma ta anda mas faxi ki meiu ki nhos skodjeba antis i pa lebas otu rumu ki nem es ka sabi sertu.
Antis di mas fika ta sabi ma movimentu sosial e um xamada atensom pa um kauza ku sentidu di rivolta kontra um diterminadu situasom ki sta oprimi bu povu undi bu ta kumesa ta xintil na bu propi kumunidadi.
Movimentu Anti Kolonialista pur izemplu e um movimentu undi nos lider Cabral partisipa na si Funsadom pa rabenta ku korenti di kolonialismu Purtugues na Afrika, i na si lugar poi Stadu Nasom, da povu Afrikanu konsiensia di unidadi i luta atraves di Partidu moda bu ata odja ta funsiona nos pais oji, so ki manus di luta muda di konsiensia pa opsom kes atxa midjor pa nos kriansa oji bem vivi nel.
Na kazu di KORRENTI ka foi diferenti I si intensom era disperta konsiensia juvenil pa asom i pensamentu Kabralista em primeru lugar i dipos kria kondisom através di priparasom di um Partidu pa da kontinuidadi a ideia di Cabral, konsiderandu ki tantu primeru ou sigundu jerasom fadja na kel sentidu di Kabral, kuandu na nós optika es troka di Komboiu Panafrikanista Revolusonariu pa Komboiu Kapitalista i Imperialista ki ta lebas mas rapidu.
So ki ka foi bem asim si nu analiza frazi Kabral : Kriansa flor di Rivolusom i Razom di Nos Luta. Di fatu si Na Fransa Di Goli, na Portugal Salazar, na Italia Musolini, Na Alimanha Hitler i es mobiliza sis povu na anus 60 pa di um sertu forma es tenta Rikoloniza Afrika atraves di umiliasom i oprisom di nos povu pa ki oji sis kriaansa vivi SABI na kapitalisu NOS neem pur isu nu ka ata vivi sabi na nos país.
Komu kualker movimentu tem asom pratikus i metas a kurtu i longu prazu Movimentu mostra ativistas ki staba asosiadu ma obijetivu primeru e DJUNTA MON NA OKUPASOM DI PILORINHU komu primeru grandi barku ki ta lebanu a RIVOLUSOM.
Movimentu tinha komu ideolojia sentral fazi es izemplu ba kontisi na tudu Praia i dipos Tudu Ilhas.
Kes asom la leba kom ki Kamara asilera prusesu di demolisom i kontrolu em di tudu spasu na Praia i riforsa vijilansia na kes ki staba na Interior, kantu e da konta ma movimentu sta poba otuz jovens ku es influensia na kabesa.
Tudu kel prusesu la tinha komu um uniku meta i pontu di xegada: AFRIKA
Si nhos rapara bem oji Movimentu sta pripara pa lansa dizenhu arkitektoniku di sentru Ethiopanafrikanu ki bazikamenti dja staba projetadu desdi primera ora: RILIGA KABU VERDI NA KONTINENTI.
Asim komu Pilorinhu, Finka Pé , Bok Liguey na Senegal i finalmenti DEUG 27 obijetivu fundamental e SUSTENTABILIDADE DI NOS VISOM RUMU A UNIDADI AFRIKANA.
Ethiopia e ultimu pasu di um grandi prusesu ki sta ba kumesa ki e Okupasom na Europa i na Merka. Na Europa sta preevistu okupasom pa anu ki ta bem i kriasom di um sentru di RI-PARASOM.
Nu ta kumesa ku ideia di RIPARASOM, ou seja risikla tudu tipu di material moveis di kaza, transportis veikulus i material industrial pa djuda Sentrus em jeral na Afrika interu, na mesmu tempu ki nu ta resikla kabesa di klasi media rumu a konsiensia di MUNDU KAZA.
MUNDU KAZA e ideia di ki tudu mundu e fidju MAMA AFRIKA.
Nu debi tem spasu di iventus muzikal, di produsom di industria textil inkluidu etc etc
Bazikamenti nu sta bem kria um Zona Industrial Sosial pa konsolidasom di ideias sobri PANAFRIKANISMU NA EUROPA I NA MERKA.
E PUR ISU KIM NTA FLA NHOS BERDIANUS NHOS STA ATENTU DI NHOS RISPOSNABILIDADI DI NASI NES KANTU D´FRIKA GRANSINHUS DI ILHA. KA NHOS FIKA TA DURMI TA PENSA ME SO EUROPEU KU MERKANU KI PODI OKUPA AFRIKA PAMO VISI-VERSA STA EM MOVIMENTU.
Um pikenu storia pa freska nhos kabesa. Na Sul di Fransa anu em 2020 ntevi um konversu kabesa friu mi ku um riku velhu proprietariu na pôr di sol ki si mon dja staba kansadu di produsom di oliu di jirasom, pa frita i kuzinha kumida.
Tratoris, terrenus tudu abandonadu omi troka tudu sis ambisom ke tinha na pasadu pa e pasa ta fazi trabadju di turismu indu a pontu di kobram ti um boxer ki nta poi na makina di laba.
Omi muda di ideia di kriasom di Baka, oliu ku grandi stensom di terenu investimentu na aria di “turismu ekolojiku” peska na si pikenu Lagu i akampamentu i paseiu ku turista anualmenti na tempu kalor pa mostras mo ki kou era.
Ago nos xintadu na por di sol, nbrinka ku el: omi anho nkre kumpra nho es terenu ou nhu podi daba mi el tambe, konsiderandu kel ki nhos tomanu na Afrika.
e rispndem ami nhas antipasadu ka fazi kela. Kuze ki nhos imigranti nhos sta bem fasi pa li si nhos tem tera. kOmberrsu kumesa tranka. Silensiu kada um spadja pa si ladu ami pa teenda el pa si vivenda.
I mi ku mi so: ali beem tempu ki afrikanu ta okupa nhos tera tambe sima nhos okupanu.
Sapatinha riba ku baxu kenha ki sabi mas konta midjor.