Munti manus ku manas inda sta ku kabesa baradjadu a serka di kuze ki e spiritualidadi dentu luta, kuze ki e luta dentu spiritualidadi, i mas inda kuze ki e luta ku visom di spiritualidadi.
Pa nu intendi es asuntu nu matuta midjor na da um bolta pa raiz.
Nos afrikanu kantu papa na Roma na anu 1494, pamo konfusom di spanha ku Portugal na diskubri tera, pa risolvi divididu mundu em dos padaz e da um pa Portugal di sel kumesa na Santantom di kabu verdi tudu afrika kelotu metadi fika pa Spanha.
Bom, a partir di la kumesa storia ma nos afrikanu nu mesti serba sivilizadu, spiritualizadu, xikotadu, maradu i violadu di akordu ku sistema, ti txiga dia i ora kantu spritu labanta mininu Kabral pa Libertanu na 12 di Setembru 1924 ti 20 di janeru 1973.
Anti nu bai mas txeu na kombersu fika ta sabi ma Spritualidadi ke propi Liberdadi.
Storia li e txeu ma nu ka sta bem longal. Kuza e u seginti. Afrikanu e resebi mensaji di kristu, fidju spritu santu moki nhos kre txomal, santisima trindadi na mesmu tempu ki Roma, ou seja Europa ka mas bedju ki Afrika na kunhesimentu di Dios. Kela e um mentirada. Problemas ki Europa so kre konta si storia di reinadu i pou skesi di di bo.
Pamo tantu na Europa komu na Afrika Reinadus sta sigiba i sta pensaba ma Dio ki inspiras pes lider. Problema e korupsom. Tudu l]ider e inspiradu na skrituras sagradas biblikas. katem num sistema pulitiku imperial ki sta fora.
Antigu testamentu, ki nu enxinadu me anti di kristu ou seja anti di 2000 anu dja staba ta rolaba na Norti di Afrika, entri Ethiopia ku Egiptu subi tudu kes ladu ti Israel palavras di Dios.
Purtantu kolonizadoris kantu es bem sis misom era mutu simplis spandi sis imperiu i dividi tudu mansom, imperiu i povus entri pretu ku branku, superior a inferior: gera, domina, kontrola iduka di akordu ku sis visom di spiritualidadi ou seja da ralijion.
So ki kada bes ki es ba ta avansa pa dentu di Afrika a partir di PILORINHU es kumesa ta da konta ma Afrika me RIKU na Ghana, Mali i Songhay, Afrika di Sul, Zimbabwe, Wolof, Egiptu, Nubia i Ethiopia. Es fika spantadu tudu.
Purtantu kantu Europeus es bata oserba putensialidadi ki afrika tem pa dizenvolves sis ambisom terorista ou seja industrializa mundu i rabenta ku tudu natureza i kriasom divina, ku falsa verdadi mes sta bem abuli skravatura.
Pa munti nos afrikanu spiritualidadi e spritu di nos luta kontra mal. Spiritualidadi sempri foi uzadu pa nos kombati kontra kusas mariadu kusa kadretu.
Es txomal fetisaria. Nu ta kombati ku orasom tudu kel ki sta mal i dipos ku arma si ka kre obidu.
Ora ki nu tem um visom e ta txomadu profesia ou manifestasom di spiritualidadi ki e bazikamenti komprovadu na pratika di bem, verdadi i uniom.
Spiritualidadi foi utilizadu sempri na pulitika di nos reinadu Afrikanu.
Tudu reis ta kriditaba ma es era riprizentanti di um Dios maximu pes konduzi sis povu a um bom destinu istu e sem sufrimentu, na armonia i bem balansadu.
Nu tem izemplu di Kabu verdi ku Rabeladu ou seja Riveladu para além di es rijeta Igreja, es rijeta vasinasom na kel altura di anus 1940, i tudu idukasom ki sistema Purgezis kreba poba es, kriditandu na um pulitika Kabralista, manti sis bandera i fé.
Otu izemplu mas pratiku di uzu di spiritualidadi e sem dúvida nasom milenar Ethiopiana. Impériu di Ethiopia da tudu izemplu ki pudia daba pa sistema internasional a serka di spiritualidadi.
Ethiopia fazi si 227 reinadu baziadu na spiritualidadi até 12 di Setembru di 1974, dipos di kela nu tem 17 anus di terror mas violentu na Afrika + 27 anu ate 2018.
Purtantu so agora ki storia podi ser midjor kontadu, istu gosi li ku 47 anu.
É um misom di Fundasom DEUG 27 alerta i studa es visom pa uniom di Afrika.
Um di kes nos dipartamentu ki sta na últimu i desimu sigundu lugar txoma SPIRITUALIDADI. Kel dipartamentu li e risponsavel pa studa, diskuti, partilha pontus di vistas religiozus sobri kriasom i uniom di umanidadi.
Dentu Fundasom tem membrus di kuazi tudu ralijiom i konsepsom spiritual.
Lideransa sem fe e moda korpu sem spritu, ou seja ka ta sirbi pa nada.
RMUV.
