Normalmenti kualker movimentu oki e ganha statutu dum Ideolojia i ke ganha Puder e ta kaba ku dumina i kontrola um grupu ou povu ki seta es krensa. Kela ta sirbi pa tudu ideolojia tantu komu Kolonialismu, Kapitalismu, sosialismu, komunismu bla bla bla.
E klaru ki grupu ta seta um determinadu ideolojia oki e odja vantaji ki kel ideialismu ta trazel pe sai di oprIsom i di ISlusom pe labanta i da LUZ a kel novu sistema pa si grupu kumundadi nasom ou rasa.
Prublema ka sta na toma puder mas na kuze ki e ta fazi si e ta fika kol na si mon ou si e ta partilhal ku otuz ki djudal toma es puder.
So ki uki maioria di pesoas ta skesi e ma tem dos tipu di Puder: Spiritual i Material. Munti bes krensas ta dipendi di um ou di otu otu bes taa tontudja na tudu dos.
Kantu MPD na CV toma puder e kumesa ta tem sigidoris, ki pasa ta ser poku a poku krentis di ideolojia Kapitalista Osidental sem sabi fika kontra sistema di Panafrikanismu ki ta luta pa si propi libertasom
PAICV kontinua ta fazi u mesmu, enkuantu ki um Bazia na Sosialismu i di vez en kuantu komunismu kelotu staba mas e pa Liberalismu i Kapitalismu propriamenti ditu skerda direita bla bla bla.
Tantu um komu otu Bazia na Fé Protestanti, Katoliku, Adventista i mesmu Masonaria ninhum des elitis politiku ka entra na kel ramu di Panafrikanismu ou di spiritualidadi diferenti kim aponta kazu di kristianismu negru ou Rastafarianismu.
Ku puder pulitiku na mon rapidamenti lideransas di sistemas kapitalistas i komunistas di Xina kualker um di kes dos ala pontadu avansa pa fasilita alguns elitis ki ganha Puder ikonomiku kada vez mas, rarisimu e kazu di algum grupu ou individu ki kumesa ta avansa na Panafrikanismu i na parti di kristianismu Negru.
Kazu di Rastafarianismu filosofia ki nasi na Jamaika i spandi atraves di múzika di Bob Marley ki ta seta Ras Tafari , Haile Selassie I tudu titulu ki toma duranti serimonia di si koroasom na 02 di nuvembru di 1930.
E foi nomiadu komu Sinhor di Sinhor, Rei di Rei, Lion Konkistador, Tribu di Juda, Difensor di Santisima trindadi i di fé ortodoxa
Pa Karaibianus moda Jamaikanus, Trinidadi Tobegu i Haity i na Merka tambi, era mumentu Izatu pa konkretizasons di profesias di Markus Garvey pa Afrikanus volta pa Afrika e mutu otuz moda na kazu ki nu sita risentimennti na livru Panafrikanismu di Legum, na Afrika di Sul ku John Chilembwe i Joseph Booth ki djuntu es amiasa kria Uniom di Afrikanu Kristom i tudu konsepsom ke karega sobri kel ki foi konxedu pa Supremasia Negra em kontraposisom ku umiliasom, rasismu, i superioridadi Branka.
Rastafarianismu komu Movimentu ganha forsa na várius otus movimentus pulitikus, ideolojikus i filosofikus sobritudu kultural i ki foi di midjor forma riveladu profetikamenti totalmenti atraves di Muzikas di reggae ku grupu di Wailers .
Nes kontextu si Panafrrikanismu dja staba komu um korenti pulitiku i ralijiozu na otika kristom negru e ta bem panha kel maior forsa na Ideolojias di odja Selassie I komu reenkarnasom di Jizus tendu em konsiderasom si papel i disempenhu na pulitika internasional enkuantu primeru Imperador Afrikanu ki ta xinta i ta diskuti grandis temas komu Paz internasional justisa i dignidadi pa Afrikanu na arena global.
Enkuantu ki Selassie nunka ka pensa si kabesa komu um Deus, a nau ser si sigidoris, e ta dexa tudu si vida politika markadu pa um intensu priisensa spiritual na seiu di komunidadi internasional duranti 40 anu.
Ras Tafari ta kumesa ta dimarka moda Melchezidek sobrinhu di Noé, kel ki foi risgatadu pa Mikael antis di diluviu i bem marka komu Rei Di paz undi munti ta kridita mael mesmu era rinkarnasom di Jizus.
Movimentu Zionismu ki kumesa ta prokura reuni povus kes ta konsidera perdidu di Judaismu Antigu, um stadu kriadu em 1948 dipos di serka di 1900 anus dipos di si distruisom, ta kumesa renvendika puzisom di povus skodjedu em diresom a tera prometida ke Israel pa es.
Movimentu Rastafari pelu kontrariu sta kontestaba ma verdaderu Zion me Ethiopia konsiderandi fatu storiku ki ta prova atravês di propi stensom di dinastia Salomonika na Etiopia i nau na Israel ou na Roma a partir di Menelik 1 fidju di Makeda ki e Ethiopiana, 1000 anus antis di Jizus nasi na Jerusalem apizar di studus ku fokus osidental ta nega es argumentu pamo kel ta serba um negasom di sis propi filosofia di superioridadi spiritual i umanu sobri omi Afrikanu ke kaba ku skravizal i kolonizal duranti 400 anus.
Kel dos Batalha i victoria di Ethiopia sobri imperiu di Roma foi sufisienti pa prova ma di fatu na pratika ma Selassie I tantu komu Menelik staba protejidu pa Puder Spiritual mas di ki es.
Ntom Rastafari ki kumesa ta entra Ethiopia pa forma kel Nasom Rastafari ka ganha mesmu impatu ki movimentu Zionismu di Judeu na Israel.
Pamo ki movimentu Rasta dipos di 90 anu, desdi 1930 kantu Ras Tafari toma nomi di Haile Selassie I, Puder di Santisima Trindadi, inda Rasta ka konssigi tem kel forsa di Judaismu, moda Nation of Islam, ou di sigidoris di profeta Joseph Smith igreja di Jesus Kristu di ultimus dias, nem komu varius otuz novus seitas relijiozus moda kazu di Templu Maior Etc?
Antis di mas nta pensa pur enkuantu ma fatu e ki Rastafarianismu e um movimentu ki ta karega maior forsa di kontrariu ki tudu kes otuz la.
Singundu pontu nta atxa ma movimetu Rastafari mesti redifinisom dei kel ideolojia li, i terseru movimentu Rastafari di novu jerasom ka sta liga verdaderamenti movimentu ku bazi na Panafrikanismu sima komunismu fazi ku bazi na luta kontra spansom di Osidenti reba des.
Nu odja um ultimu izemplu di Maomismu na Xina. Kuze ki leba Xina labanta di 100 anus atras pa maior imperiu oji na mundu?
Antis di mas foi determinasom di um Lider rumu a libertasom d forsas di opresom u ki lebal spandi atraves di kriasom di um nasionalismu.
Movimentu Panafrikanu mesti ranja kasamentu ku movimentu Rastafari pa iliminasom di tudu kes lixu mental ki sta fomenta um novu rastafarianismu ki ka tem nada a ver ku um verdaderu rikonhesimentu i pratika di um Puder Spiritual ki tudu dos ta difendi.
Pami Ethiopanafrikanismu e Xavi pa abri um porta ki apizar di nos mostradu nu sta inisti ku meti txabi na um otu porta
E normal kualker movimentu tem varius ramifikasom mas verdaderu e kel ki ta risolvi problema ki e mesti na nos kazu e risolvi problema di Unidadi d Afrika ki nu ta kridita me sta apenas na Paz di Ethiopia ou seja oki tudu grupus di Rastafari, ou seja sigidoris di Selassie I komu Papa di Afrika, Rei di Paz, djunta sis mon pa leba mensaji di Paz na Ethiopia.
Fazendu kela ta bem tem Unidadi di tudu pais Afrikanu i rissgati di dignidadi pa povu Afrikanu na mundu interu.